രാവിലെ

ഈയിടയ്ക്കാണ് സേതുരാമ അയ്യര്‍ CBI യുടെ നാലാം ഭാഗം ഞാന്‍ വീണ്ടും കാണാനിടയായത്. അതില്‍ ഏവര്‍ക്കും പ്രിയപ്പെട്ടതും, വിജ്ഞാനപ്രദവുമായ ഒരു രംഗമുണ്ട്. കാപ്ര സേതുരാമ അയ്യരെ ചോദ്യം ചെയ്യുന്ന രംഗം. അതില്‍ ഒരു ചോദ്യം ഇങ്ങനെയാണ്.

കാപ്ര: "ചോദ്യം. സൂര്യന്‍ ഉദിക്കുന്നത് കിഴക്ക്."

അയ്യര്‍: "അല്ല."

കാപ്ര: "പിന്നെ?"

അയ്യര്‍: "സൂര്യന്‍ എവിടെ ഉദിക്കുന്നോ അത് കിഴക്ക്. 360 ഡിഗ്രിയില്‍ ഭൂമി സൂര്യനെ ചുറ്റി കൊണ്ടിരിക്കുകയാണ്. ഭൂമിയും സൂര്യനും സ്വയം ചുറ്റുന്നുണ്ട് താനും. ഇവിടെ സ്ഥിരമായ ദിക്കിന് എന്താണൊരു പ്രസക്തി? ഉദയം അസ്തമയം, ദിക്ക്, ദിശ ഇതെല്ലാം വെറും സങ്കല്പങ്ങള്‍ മാത്രമാണ്.   ദൈന്യംദിന ജീവിതത്തിലെ സമയാസമയങ്ങള്‍ തീര്‍ച്ചപ്പെടുത്താനുള്ള ഒരു കണക്ക്.വ്യാവഹാരികസത്യം എന്നു പറയും. Hypothesis."

കാപ്ര: "ഹും...."

ഞാന്‍ ഒന്നാലോചിച്ചു. കാപ്ര ഇതുപോലൊരു ചോദ്യം എന്നെപോലുള്ള IT കണ്‍സള്‍ട്ടന്റിനോടാണ് ചോദിച്ചിരുന്നെങ്കില്‍. അത് ഏതാണ്ട് ഇതുപോലെ ആയിരിക്കും.

കാപ്ര: "ചോദ്യം. നിങ്ങള്‍ ഉണരുന്നതു രാവിലെ."

IT കണ്‍സള്‍ട്ടന്റ്: "അല്ല."

കാപ്ര: "പിന്നെ?"

IT കണ്‍സള്‍ട്ടന്റ്: "ഞങ്ങള്‍ എപ്പോള്‍ ഉണരുന്നോ അത് രാവിലെ. ഞങ്ങളുടെ ഷിഫ്റ്റ്‌ ടൈം, പ്രോജെക്ടിന്റെ ഗതി വിഗതികള്‍ക്കനുസരിച്ചു മാറിക്കൊണ്ടിരിക്കും. കൂടാതെ ഇടയ്ക്കു വേറെ ടൈം സോണില്‍ ഉള്ള ക്ലൈന്റ് ഓഫീസിലും ജോലി ചെയ്യേണ്ടിവരും. ഇവിടെ സ്ഥിരമായ നേരത്തിനു എന്താണൊരു പ്രസക്തി? രാവിലെ, രാത്രി, പ്രാതല്‍, അത്താഴം ഇതെല്ലാം വെറും സങ്കല്പങ്ങള്‍ മാത്രമാണ്. ദൈന്യംദിന ജീവിതത്തിലെ ജോലികള്‍ തീര്‍ക്കാനുള്ള ഒരു കണക്ക്. പ്രതിജ്ഞാബന്ധത എന്നു പറയും. Commitment".

കാപ്ര: "എന്താ ചെയ്യാ..."